O turismo galego medra un 12% nos tres primeiros meses do ano consolidando así a súa desestacionalización

O bo comportamento da demanda nestes tres primeiros meses vén como consecuencia dos incrementos rexistrados en febreiro, coa festividade do Entroido, e sobre todo en marzo, mes no que se celebrou a Semana Santa e que supuxo un importante nivel de afluencia turística a Galicia.

Importancia do segmento hoteleiro

Ademais, neste primeiro trimestre o 84% da demanda corresponde ao segmento hoteleiro, mentres que o 16% restante fica no aloxamento extrahoteleiro (que inclúe, entre outros o turismo rural ou os cámpings e albergues).

Todas as tipoloxías superan os niveis de demanda do pasado ano, de forma máis notable os aloxamentos de turismo rural e os albergues, en máis do 40%. Neste período o 78% da demanda corresponde ao turismo de ámbito nacional e o mercado internacional absorbe o 22% do total da demanda.