A temperatura media rexistrada en verán situouse nos 18,8ºC, polo que se considera lixeiramente frío

Tal e como se recolle de xeito detallado no informe, o verán comezou cunha primeira quincena anticiclónica no mes de xuño, seguida por unha segunda co achegamento dalgunhas borrascas e zonas de are frío, que deixaron temperaturas máis baixas do habitual para esta época do ano.

No mes de xullo a presenza de aire frío no Atlántico norte impediu que as altas presións se localizasen ao norte da península Ibérica, deixando temperaturas medias por debaixo do agardado, principalmente en Pontevedra e no sur da Coruña. Esta situación deixou unha temperatura media de 19.0ºC, cunha anomalía de -0.66ºC, resultando un mes frío.

O verán rematou cun mes de agosto con predominancia de situacións anticiclónicas, agás a primeira semana do mes, na que predominaron as borrascas. En calquera caso, as xornadas posteriores foron de sol e calor, pero aínda así non foron suficientes para facer que as temperaturas medias non se afastasen da normalidade.

Precipitacións normais

En canto ás precipitacións no conxunto dos meses de xuño, xullo e agosto, foron un 20% superiores ao período de referencia. O mes máis húmido foi xuño, con cuantiosas chuvias —a media foi de 96 L/m2— e unha porcentaxe de precipitación dun 102% superior ao valor climático normal.

No caso do mes de xullo, só se acadaron niveis normais de precipitacións nas provincias de Pontevedra e o sur da Coruña, mentres que en moitas localidades da Comunidade apenas se rexistraron. Así, o segundo mes do verán tivo unha precipitación media de 19 L/m2.

Nesa mesma liña se mantivo agosto, xa que as choivas dos primeiros días non foron suficientes para acadar os valores climáticos normais no conxunto da Comunidade, que estiveron un 32% por debaixo do normal.

Tanto nas precipitacións como nas temperaturas, o precedente máis frío e máis húmido é o verán do ano 2018, cunha temperatura media de 19.8ºC e unha porcentaxe de precipitación un 32% superior á media.