Skip to main content

Galicia é o segundo destino da España Verde con mellores perspectivas turísticas de cara a finais de ano

A directora de Turismo de Galicia, Nava Castro, puxo hoxe en valor o momento de consolidación polo que atravesa o turismo galego, que está a repercutir, dixo, nunhas boas expectativas por parte do sector de cara a finais de ano. Así o constatan os resultados da última Enquisa de Confianza Turística Empresarial publicada por Exceltur, aos que fixo referencia na súa participación na xornada internacional O impacto socioeconómico do turismo en Galicia, organizada hoxe no Consello Económico e Social de Galicia (CES).

Como indicou, o estudo sitúa a Galicia como o segundo destino da España Verde con mellores perspectivas turísticas por parte dos profesionais para este último trimestre do ano. De feito, o 79,1% dos empresarios galegos amosa o seu optimismo de cara a manter ou mellorar resultados, por riba do resto de destinos da España Verde, agás do País Vasco. Unha situación que, como engadiu Nava Castro, vén avalada pola consolidación dos parámetros de calidade que está a experimentar o turismo galego nos últimos anos, con melloras das tarifas e da rendibilidade hoteleira.

Durante a súa intervención, tamén puxo en valor a importancia crecente do turismo na Comunidade como actividade xeradora de riqueza, que supón o 11% do PIB e o 12% do emprego e puxo de manifesto os avances experimentados cando en 2017 se mellorou un 4,6% o número de ocupados e houbo unha baixada na taxa de paro e de temporalidade.
Impacto positivo do Camiño de Santiago

Os participantes na xornada tamén coñeceron o actual modelo turístico autonómico, no que a Consellería de Cultura e Turismo e o sector traballan no marco da Estratexia do turismo de Galicia 2020 que aposta por consolidar un turismo tranquilo, sustentable e de calidade, que aposta polos seus mellores recursos propios e bota man da autenticidade. Tamén se afondou nos resultados do Estudo do Impacto Socioeconómico no Camiño de Santiago, levado a cabo pola Universidade de Santiago de Compostela co impulso de Cultura e Turismo. Estase a converter nunha importante ferramenta para a toma de decisións ao redor da Ruta Xacobea e constata a súa positiva repercusión económica, demográfica ou cultural.

Xunto a isto, e coa vista posta no Xacobeo 21, durante a xornada tamén se puxo de manifesto a importancia que terán eventos como este para a economía galega. De feito, xa está operativo o programa de beneficios fiscais, que permanecerá vixente ata o 30 de setembro de 2021 e que está a ser executado pola Consellería de Cultura e Turismo, a través da Axencia de Turismo de Galicia. Así, as doazóns para o Xacobeo 21 implicarán desgravacións do 40% no imposto de sociedades e de ata o 80% no IRPF e favorecerán un maior alcance para a promoción e organización desta cita ao tempo que repercutirá na sustentabilidade do evento.
R.