7,2% máis de viaxeiros en Xulio

Este aumento contabilizado no mes de xullo de 2011 respecto ao mesmo período de 2009 tamén se reflectiu nas pernoitas, cunha suba do 3,6%. Estas cifras melloran as rexistradas en xullo de 2009, tanto no que se refire aos niveis de demanda como de ocupación hoteleira. Ademais, o grao de ocupación situouse por riba da cifra rexistrada en xullo de 2009, cando o nivel era do 42,43%. As cifras están comparadas coas do 2009 por tratarse dun período similar, sen acontecementos relevantes como a celebración do Ano Santo 2010.

Así pois, Galicia recupera certo nivel de demanda nos establecementos hoteleiros en comparación cos anos 2008 e 2009, dato que consolida a tendencia positiva amosada no pasado mes de xuño.

En total, durante o mes de xullo os hoteis galegos rexistraron un total de 991.141 pernoctacións, o que sitúa a Galicia como a sétima comunidade no ránking estatal, só por detrás de Baleares, Cataluña, Andalucía, Canarias, Comunidade Valenciana e Madrid. En canto ao número ao número de viaxeiros, Galicia recibiu no mes de xullo a un total de 435.187 turistas, situándose no posto oitavo, por detrás de Cataluña, Andalucía, Baleares, Madrid, Comunidade Valenciana, Canarias e Castela-León.

Ademais, durante o primeiro semestre de 2011, o excursionismo internacional en Galicia incrementouse en máis dun 18% en relación ao mesmo período de 2010. Deste xeito, entre os meses de xaneiro e xuño de 2011, a comunidade galega recibiu a máis de 2,3 millóns de excursionistas estranxeiros, unha cifra superior á rexistrada no primeiro semestre do Ano Santo.