Santiago lidera en 2010 o crecemento do emprego turístico en España

O informe ‘Novo Barómetro da Rendibilidade e o Emprego dos destinos turísticos españois’ elaborado por Exceltur e correspondente ao ano 2010 analiza dous indicadores concretos para medir a rendibilidade e o impacto no emprego da actividade turística en determinados destinos de carácter urbano e vacacional de España. Os ingresos medios por habitación dispoñible (RevPar) dos hoteis e o número de afiliados á Seguridade Social nas ramas turísticas definidas pola OMT como directamente vinculadas ao turismo e mais ao comercio pola súa relación co gasto turístico son os indicadores que se miden no informe.

O estudo revela que os efectos do Ano Santo 2010 permitiron a Santiago de Compostela liderar en 2010 o crecemento en emprego turístico e RevPar hoteleiro entre os destinos urbanos españois, con variacións positivas en ambos indicadores por encima do 10% a respecto dos rexistros do 2009. Tamén as cidades galegas de Lugo e Pontevedra se sitúan no grupo de destinos urbanos nos que en 2010 se elevou o emprego turístico e os niveis dos seus ingresos hoteleiros, no que figuran cidades como Tarragona,Teruel, León, Burgos, San Sebastián, Pamplona, Valencia e Barcelona.

No conxunto dos destinos urbanos de España a rendibilidade dos hoteis medida polo RevPar no 2010 situouse en 47 euros, cifra que supera nun 5,1% o dato do ano 2009. Barcelona, con 69,5 euros de media e San Sebastián con 62,4 euros son os destinos urbanos que presentan unha maior rendibilidade hoteleira. Neste sentido o destino urbano galego que mellores cifras presenta é a cidade de Santiago de Compostela, cun RevPar de 40 euros, cifra que supera nun 33,9% o nivel do pasado ano 2009. Trátase do maior incremento de todos os destinos urbanos. Neste sentido, o Xacobeo 2010 permitiu á cidade de Santiago liderar o crecemento da rendibilidade empresarial hoteleira a nivel estatal, superando en case 8 puntos porcentuais á cidade de Tarragona.

Este forte crecemento da rendibilidade do sector hoteleiro débese a dous motivos; a suba da ocupación media,que supera nun 15,6% o nivel de 2009 ata situarse no 57,4% neste ano, e ao incremento dos prezos hoteleiros medidos pola tarifa media diaria aplicada nos mesmos –o prezo medio da habitación dobre situouse en 69,8 euros, un 15,7% máis que en 2009. De modo que se unen dous factores na mesma dirección á hora de explicar os bos resultados dos hoteis da cidade de Santiago: crecementos da ocupación nun contexto de suba das tarifas, dando como resultado un incremento da rendibilidade media.

Este bo comportamento é unha característica que se observou practicamente en todos os meses do ano, medrando de forma continua dende marzo a decembro e con taxas que superaron o 20 na maioría dos meses e acadaron as cifras máis altas no último trimestre. Destaca non só o liderado da cidade de Santiago no crecemento da rendibilidade empresarial senón tamén os bos datos rexistrados nas restantes cidades galegas porque todas elas experimentaron crecementos do RevPar en comparación co 2009. En Ourense superouse nun 24,3% o nivel do ano pasado e en Lugo un 11,5%.

No relativo ao emprego, o crecemento do emprego na rama turística da cidade de Santiago é unha característica que se observou practicamente en todos os meses do ano, cunha intensidade ademais similar dado que a taxa de variación rolda o 10% interanual na maior parte do ano. Pontevedra e Lugo rexistraron tamén subas importantes, do 4,6% e 4,3% respectivamente, quedando en sexto e sétimo lugar a nivel estatal, por intensidade de crecemento.