A mellor gastronomía de Galicia promociónase en Madrid en novembro

A Consellería de Cultura e Turismo, a través da sociedade Turgalicia dependente da Secretaría Xeral para o Turismo, presentará en Madrid entre os días 12 e 21 de novembro a promoción Saborea Galicia, unha iniciativa coa que os mellores produtos da gastronomía estarán presentes para o público madrileño no histórico mercado de San Miguel.

Este acontecemento, organizado en colaboración coas Consellerías de Medio Rural e de Mar, servirá de escaparate para os produtos gastronómicos galegos máis senlleiros de Galicia e posibilitará a súa comercialización entre o público madrileño ao tempo que se difunden os valores turísticos da comunidade galega.

No mercado de San Miguel, Turgalicia instalará 12 postos de venda de produtos e cada un deles estará atendido por dúas persoas coñecedoras das características destes.Dentro destes postos, que se disporán a xeito de carriños decorados coa imaxe característica desta promoción, exhibiranse produtos galegos das distintas denominacións de orixe e indicacións xeográficas protexidas, relacionadas cos sectores dos queixos, a carne, os produtos da horta, a panadería, a pastelaría, os produtos do mar, o mel e a castaña. Ademais, promocionaranse os viños das cinco denominacións de orixe, así como os viños da terra e as bebidas espiritosas.

Nesta promoción da Xunta da Galicia, difundiranse tamén os valores dos produtos con certificación ecolóxica, e os visitantes, ademais de poder informarse e mercar produtos gastronómicos de Galicia de calidade, poderán obter información turística sobre as posibilidades que ofrece o territorio galego no eido gastronómico e turístico, grazas a un punto informativo que se instalará no propio mercado de San Miguel.

Xornadas específicas

Na promoción Saborea Galicia, está previsto que se desenvolvan xornadas específicas para mercar e degustar os distintos produtos da gastronomía galega. Así, os días 12 e 13, estarán dedicados aos cogomelos, as castañas e ás fabas, que serán protagonistas da cociña do mercado.

Os días 14 e 15 de novembro estarán dedicados ao peixe e ás conservas, mentres que os mariscos serán os protagonistas das xornadas do 16 e o 17 de novembro. Os días 18 e 19 haberá promocións especiais das carnes galegas e dos queixos, os días 20 e 21 de novembro. Ademais, realizaranse dúas catas maridadas diarias con viños, unha ás 13:00 horas e outra ás 21:00 horas.