Preséntase en Compostela o Observatorio do Turismo

A secretaría xeral para o Turismo, Carmen Pardo, presentou en Santiago de Compostela o Observatorio do Turismo de Galicia, nun acto no que estivo acompañada polo director do Instituto de Estudos Turísticos de Galicia, José Paz Gestoso.

O Observatorio é, en palabras da secretaria xeral, “o punto de partida dun sistema de información que se irá alimentando de forma continuada e que parte de diferentes fontes de información estatística”. O observatorio “vén a colmar as necesidades dun sector que supón para a nosa comunidade ao redor do 11% do PIB”, recalcou Carmen Pardo, quen engadiu que o observatorio “constitúe unha plataforma de referencia na elaboración na obtención e elaboración do coñecemento turístico na nosa comunidade”.

O Observatorio, que agrupa información xerada a nivel interno, ao tempo que engloba tamén outras fontes de carácter secundario, cubre todas as parcelas de información turística, tanto dende o punto de vista da oferta como da demanda. Así, “non só ofrece datos estatísticos, senón unha análise dos mesmos, xerando un valor engadido ao sistema turístico”, agregou a secretaria.

A páxina web do Instituto de Estudios Turísticos de Galicia (www.ietgalicia.com), que inclúe un apartado específico dirixido ao Observatorio, cuxa estrutura de funcionamento foi explicada polo director do Instituto de Estudios Turísticos de Galicia, José Paz Gestoso. A web está deseñada tamén como unha plataforma de difusión e divulgación dese coñecemento, a través do cal se poida obter, medir, analizar e divulgar a estrutura e dinámica do turismo, “non só como actividade económica, senón tamén como eixo estratéxico de desenvolvemento territorial”, especificou Pardo López.

O Observatorio aséntase sobre varios principios metodolóxicos: obxectividade, pragmatismo, complementariedade e optimización de recursos, continuidade e comparabilidade. Trátase, de dar resposta ás demandas do sector, tanto público como privado, “ofrecendo os inputs necesarios para a toma de decisións eficientes en materia de planificación e xestión turística” e de “establecer un mecanismo de análise e avaliación do sector, observando as dinámicas de comportamento e tendencias do mesmo no medio e longo prazo”, aseverou a secretaria xeral.

Liñas de acción

En canto á estrutura, o Observatorio, que recompila datos estatísticos dende o ano 1999, contempla diferentes áreas ou liñas de acción entre as que destaca unha análise da conxuntura turística de Galicia (a implantación experimental dun software en pequenos establecementos turísticos é un dos instrumentos máis novidosos en aras a mellorar a competitividade empresarial); un estudo da demanda turística en destino (fronte ás 2.500 enquisas que se realizaban durante os meses do verán pasase agora a elaborar un total de 10.000 enquisas que ofrecerán datos moito más amplos e rigorosos sobre a estrutura do perfil do turista).

Outra das liñas é unha análise do excursionismo procedente de Asturias, León, Zamora e Norte de Portugal, que agora pasa a ser mensual fronte ao carácter semestral que posuía antes.

Outras das áreas de acción son as referidas á análise de produtos e mercados turísticos, como os relativos a estudos sectoriais (turismo congresual,...), o estudo do movemento aeroportuario en Galicia; o Observatorio do Camiño de Santiago; o seguimento e a análise da información turística recollida nas Oficinas de Turismo, que contempla a formación do persoal e unha recompilación máis exhaustiva no tocante aos datos de perfís dos visitantes.

Por último a medición económica do turismo, con especial atención ao gasto turístico ou a formación ao sector contemplan a batería de actuacións que conforman un auténtico plan estatístico sectorial de turismo, do que se poderá beneficiar os axentes deste sector produtivo e a sociedade en xeral.