O Xacobeo destina un millón de euros ao patrocinio de congresos en Galicia

A S.A. de Xestión do Plan Xacobeo, adscrita á Consellería de Cultura e Turismo, publica na súa páxina web (http://blog.xacobeo.espatrocinio-de-congresos/) as bases e condicións do procedemento para o patrocinio de congresos, simposios, encontros, cursos e xornadas na Comunidade Autónoma de Galicia con motivo da celebración do Xacobeo 2010 e que estará revestido cunha partida orzamentaria de 1 millón de euros. A partir da publicación do procedemento que rexe as particularidades das solicitudes e do trámite, estas poderán ser presentadas desde mañá 3 de novembro de 2009 ata o esgotamento do crédito dispoñible que pechará a concesión de patrocinios.

Os congresos, simposios, encontros, cursos e xornadas que se desenvolvan durante o ano 2010 e opten a acadar subvención poderán proceder tanto de entidades públicas como privadas. Terán especial consideración aquelas propostas que supoñan novas aproximacións á temática xacobea e ao fenómeno das peregrinacións en calquera das súas posibles aproximacións: espiritual, cultural, relixiosa, patrimonial, mediambiental, gastronómica. Do mesmo xeito, valoraranse as solicitudes que potencien o carácter desestacionalizado e descentralizado da programación cultural do Xacobeo 2010 e aqueles congresos de alcance nacional e internacional de calquera ámbito profesional e investigador e temáticas actuais que, cunha ampla e contrastada participación, convoquen en Galicia a expertos e profesionais de recoñecido prestixio e proxección.

As solicitudes presentadas ante a Comisión de valoración creada a tal efecto deberán estar acompañadas do seu programa provisional; da campaña de promoción on line e off line asociada ao evento; información sobre publicacións previstas en relación co evento e previsión doutros soportes publicitarios; documentación sobre outros colaboradores e importe; ámbito territorial do evento; número e descripción de asistentes así como a súa traxectoria profesional e/ou investigadora dos conferenciantes e relatores e, no seu caso, a súa proxección social.

Unha comisión de valoración creada a tal efecto decidirá a cantidade a achegar por parte da S.A. de Xestión do Plan Xacobeo en concepto de patrocinio, dependendo de factores como a difusión, interese ou número de participantes. A S.A. de Xestión do Plan Xacobeo poderá rexeitar aquelas solicitudes que non se adecúen aos obxectivos do Xacobeo 2010.

Dereitos e obrigas

Unha vez concedida a axuda, o patrocinado deberá cumprir con varias obrigas contempladas no procedemento. O beneficiario da achega fará constar os anagramas da S.A. de Xestión do Plan Xacobeo en todos os seus soportes, cun tamaño e visibilidade proporcional ao importe do patrocinio. Asemade, o patrocinado asumirá todos os gastos para a produción, instalación e mantemento de todos os soportes coa mensaxe publicitaria que en cada momento notifique a S.A. de Xestión do Plan Xacobeo.

Cun mínimo de trinta días previos ao comezo do evento, a empresa promotora deberá presentar un informe actualizado que, no caso de conter diferenzas substanciais co primeiro, poderá repercutir nun axuste no importe da achega.