O Xacobeo participa no XX Encontro Compostelán en Italia

A Confraternita di San Jacopo e o Centro Itialiano de Estudos Compostelans celebran esta fin de semana en Perugia a vixésima edición do seu encontro anual sobre o Camiño de Santiago, no que participan representantes da S.A. de Xestión do Plan Xacobeo da Consellaría de Innovación e Industria, que colabora coa Confraternita na itinerancia da exposición “Roma-Santiago, Santiago-Roma”. Numerosos estudosos, investigadores, cofrades, membros das asociacións de amigos do Camiño, representantes institucionais e peregrinos danse cita estes días en Perugia para abordar a situación da ruta xacobea e das iniciativas que desenvolven conxuntamente para a súa promoción e difusión. O reitor da Confraternita di San Jacopo, Paolo Caucci von Saucken, foi o encargado de dirixir este encontro no que se abordaron as novidades científicas relacionadas coa ruta, a xestión dos albergues que rexenta a Confraternita e os proxectos que se desenvolven en relación co Camiño de Santiago e coa Vía Francixena.

Na sua intervención no encontro, Caucci destacou o proxecto que desenvolven os membros do Centro Italiano de Estudos Compostelans coa Consellaría de Innovación e Industria a través da súa Dirección Xeral de Turismo, a mostra itinerante sobre o camiño que une Santiago e Roma que esta primavera se puido visitar no Vaticano e que ten unha segunda itinerancia prevista para o verán en Turín. Tamén falou da necesidade de promocionar, estudar e reactivar a Vía Francixena e mais do recente irmanamento entre Santiago de Compostela e Assis. Entre os proxectos da Asociación Italiana, que tamén dirixe Caucci, está así mesmo a recuperación do Camiño Franciscano. Recentemente, a asociación ven de inaugurar o seu novo albergue en Asis, que se une aos que xa rexentan en San Nicolas de Puentefitero e mais en Radicofani.

No encontro, representantes do Xacobeo abordaron a relación da S.A. coas Asociacións de Amigos do Camiño e da importancia destas organizacións para o turismo de Galiza pola súa importancia como axentes de promoción. Propuxéronse así mesmo estratexias conxuntas de promoción do Xacobeo 2010 e a apertura de liñas de colaboración cara á reactivación da Vía Francixena. Varios membros da Confraternita expuxeron tamén as súas investigacións recentes sobre a ruta xacobea facendo especial mención as testemuñas da difusión da iconografía de Santiago no mundo.