Xacobeo e Turgalicia promocionan a gastronomía galega e o Camiño nos Países Bálticos

Unha delegación da Consellaría de Innovación e Industria –encabezada polo director xeral de Turismo, Rubén Lois, e polo xerente de Turgalicia, Xesús Pereira– visita os Países Bálticos promocionando a gastronomía de Galiza e máis un dos seus productos turísticos máis relevantes: O Camiño de Santiago. As cidades de Riga, Vilnius e Tallin acollen nestas xornadas varios encontros gastronómicos organizados e materializados polo Centro Superior de Hostalería de Galicia adscrito a Turgalicia. Nas tres cidades que a delegación visita estes días, servirase un menú similar baseado en produtos típicos do noso país. Xunto coa degustación gastronómica que se ofrece ás persoalidades presentes do mundo cultural, turístico e institucional das respectivas cidades, a S.A. de Xestión do Plan Xacobeo organiza no mesmo lugar do acto unha exposición itinerante para dar a coñecer o Camiño de Santiago nuns países nos que está a espertar grande expectación.

A mostra está composta por sete paneis con fotografías e textos sobre o Camiño de Santiago e o fenómeno da peregrinación. Trátase de sete paneis que queren facer un xogo simbólico cos sete días que tardou o corpo do Apóstolo Santiago en chegar na barca de pedra dende Jaffa a Iria Flavia.

Ademais de asistir aos respectivos actos nas cidades, a delegación galega está a manter contactos e reunións con representantes das embaixada española en Lituania e co seu recentemente nomeado embaixador, José Luís Solano. Con este último, establecéronse os contactos necesarios para iniciar futuras accións de colaboración de cara ao vindeiro Ano Santo. Tamén se estableceron relacións con representantes da Oficina Española de Turismo de Copenhague. En todos os actos promocionais estiveron tamén presentes touroperadores do país.

A exposición e máis a degustación trasládanse mañá a Tallin, en Estonia, país no que terá lugar o último dos actos promocionais previstos.