Skip to main content

Ortigueira pecha o festival máis multitudinario dos últimos anos

Supermercados sen existencias, caixeiros sen efectivo dan fe das elevadas cifras que repercuten directamente na economía da vila. Entre as novidades programadas este ano: a creación do vídeo promocional gravado en diferentes países, con tema musical propio co lema “Oito Nacións Unha cultura”, que quedará como permanente para as futuras edicións, e o cartel cos personaxes de cada nación celta, ambos creados por profesionais orteganos. O punto informativo contra as agresións sexistas “AgresiOff”, que recibiu máis de 3.000 visitas. Os concertos na praza, a campaña dar a lata cada lata cuenta, o bus os bolechas, o de “vivamos como galegos” e a mencionada “noite de Galicia”.

Algúns distribuidores de alimentación tiveron que repoñer o sábado as existencias, pois acabaron en dous días coa mercancía prevista para os catro.

Os obradoiros e cursos de foto na rúa, baile bretón, asturiano e irlandés, limitados a 50 prazas cada un, esgotaron as prazas dispoñibles semanas antes da celebración do festival, demostrando a implicación e participación de nenos e maiores. Tamén os pasacalles e as recén incorporadas actuacións no Espazo Paralaia (praza Isabel II) en colaboración co concello, fixeron de toda a vila un único escenario, onde á música e a cultura Celta estivo presente en cada rúa.

Os xaponeses Yuki Kojima Band e os galegos Dequenvessendo empataron na final do Runas 2019, situación inédita na historia do festival. Cada grupo percibe o importe completo asignado ao gañador (3.000 €) e ambos actuarán en 2020. Dada a calidade de execución de ambas formacións, a Comisión de selección para os finalistas e gañador do Proyecto Runas 2019, determinou que o premio é compartido ex aequo entrambas bandas.

A boa convivencia, o civismo e o respecto co medio por parte da mocidade acampada en Morouzos foron outros dos aspectos que cada ano melloran, segundo a opinión recollidas aos propios usuarios.

Os concertos na igrexa de fusión galego-irlandesa, a radio en directo desde o teatro, a feira de artesanía e as exposicións de carteis, completaron 4 xornadas no que a cultura celta e o espírito do festival voltou a Ortigueira coa esencia da unión das oito nacións celtas que a dirección aposta por recuperar.

E finalmente, un dos momentos máis agardados foi como é habitual o domingo á maña co gran desfile de bandas das nacións celtas, acompañada perante todo o percorrido desde ambas beiras das rúas por veciños e visitantes, como non se vira en anos. Todas as bandas entregáronse nas interpretacións e posta en escena, que percorreron as rúas da vila partindo e rematando con bises nunha Alameda que a organización acordou delimitar por primeira vez debido á gran afluencia de xente agardada. Todo un éxito de afluencia, ambiente e calidade musical nos diversos escenarios que visitantes e veciños desfrutaron.
Festival de Ortigueira