Afundación presenta en 'Sonoro empeño' un mes de cine, concertos, pasacalles, talleres, charlas e experiencias interactivas

O proxecto ten dous obxectivos fundamentais: estender a programación máis aló da propia exposición, mostrando na práctica o diálogo permanente entre as distintas disciplinas artísticas, e desenvolver a actividade cultural fóra dos espazos onde se realiza tradicionalmente.

A programación de febreiro comeza o sábado día 9, ás 19.00 h, co Coro da Rá, unha agrupación vocal a capela que utiliza o teatro e a performance para cantar en calquera situación e localización, e que nesta ocasión realizará un pasacalle que partirá desde a Sede Afundación no que convidarán aos viandantes a participar.

O día 12 de febreiro, ás 19.00 h, no auditorio da sede, celebrarase o encontro «O proceso creativo. Enfiando constelacións» coa poeta Estíbaliz Espinosa, Premio de Poesía Afundación 2017, como moderadora e no que intervirán a compositora e cantante Guadi Galego, o chef Pepe Solla e a artista Ana Soler.

Estíbaliz Espinosa volverá participar nesta programación de actividades coa intervención «A ombros de xigantes vermellas» que conxuga poesía, divulgación científica e música en directo. Será o xoves 21 de febreiro ás 19.30 h.

Os xoves 14 e 28 de febreiro, a partir das 19.30 h, terán lugar os «Paseos musicais a “Sonoro empeño”», unha visita especial á exposición con música en directo.

Todos os luns de febreiro (os días 4, 11, 18 e 25), ás 19.00 h, proxectaranse os filmes escollidos para formar parte do ciclo de cinema sobre arte e música «Sonoro empeño»: Loving Vincent, de Dorota Kobiela e Hugh Welchman (2017); A dama de ouro (Woman in gold), de Simon Curtis (2015); Big Eyes, de Tim Burton (2014); e O profesor de violín (Tudo o que aprendemos juntos), de Sérgio Machado (2015). A entrada é gratuíta con invitación, que se poderá recoller na Sala de exposicións.

«Os fíos prodixiosos da música», «Aporrear con sentido tamén é música», «O vento que se desliza produce música» e «Pentagramas máxicos» son os títulos dos obradoiros de traballos manuais dirixidos a nenos e nenas de entre 4 e 9 anos que se celebrarán todos os sábados do mes de febreiro na Sede Afundación da Coruña.

Tamén haberá espazo para a interacción coas novas tecnoloxías e os concursos. Ademais da mesa interactiva que está situada na propia sala, instalouse un piano xigante na entrada da Sede Afundación para que os viandantes poidan «tocalo» e xogar con el ao seu paso. Poden compartir este momento no seu perfil de Instagram e participar así no concurso #SonoroEmpeño para gañar unha subscrición durante un ano a Spotify Premium.

Como colofón a esta extensa e completa programación de actividades, a artista portuguesa Maria do Ceo presentará en concerto o seu novo disco, A fadista. Será o día 1 de marzo a partir das 19.00 h na propia Sala de exposicións, onde se poderá adquirir o álbum.

Así mesmo, durante este mes reforzarase a oferta de visitas comentadas: ademais das que se veñen realizando todos os mércores ás 19.00 h, engadiranse visitas guiadas todos os venres ata que finalice a exposición (1, 8, 15 e 22 de febreiro) ás 20.00 h. É unha actividade gratuíta sen necesidade de inscrición previa.