Galicia resiste á covid-19 con menos paro

Galicia, ademais, continúa creando emprego e supera a barreira do millón de afiliacións á Seguridade Social. É a terceira comunidade autónoma con maior incremento de cotizacións na evolución mensual.

Con respecto a xullo de 2020, o paro baixou un -13,33% (-23.377 persoas), o maior descenso porcentual de toda a serie histórica de datos (1996), o que inverte a tendencia negativa de xullo de 2020, cando subiu o desemprego. O paro en Galicia, deste xeito, baixa por cuarto mes consecutivo na evolución anual e segue a niveis de paro inferiores ao reflectido en xullo de 2009, isto é, ao rexistrado hai 12 anos. O desemprego baixa en todos os sectores económicos, liderando a caída a construción (-19,89%) e a agricultura e a pesca (-14,76%), seguidos do sector servizos (-12,33%) e da industria (-9,37%). Tamén descende nos colectivos prioritarios para a Xunta como son os menores de 30 anos (-29,67%), as mulleres (-11,25%) e os maiores de 44 anos (-6,48%).

A baixada do paro en Galicia é, ademais, maior que a reflectida no Estado con unha vantaxe de 3,88 puntos. De feito, a comunidade galega é a cuarta na que máis baixa o desemprego en termos absolutos. Á caída do paro únese o aumento da contratación indefinida (+8,07%) e a tempo completo (+13,93%) e o crecemento nas afiliacións nun 3,04%, recuperándose por cuarto mes consecutivo o crecemento anual. Esta suba é a maior dun mes de xullo desde 2007.

Evolución mensual

Lado, así mesmo, explicou os principais datos da evolución mensual. O paro leva baixando sete meses consecutivos: Galicia é a única comunidade autónoma que experimenta esta caída do paro desde xaneiro e de xeito continuado ao longo de todo o ano. Con respecto a xuño deste ano, o desemprego baixa nun -3,67% (-5.784 persoas), un descenso maior que o rexistrado en xullo de 2019, antes da pandemia, cando o desemprego caeu na Comunidade autónoma nun -2,79% (-4.328 persoas). Tamén baixou nas catro provincias galegas, as sete grandes cidades, nos sectores económicos e nas mulleres, nos menores de 30 anos e os maiores de 44.

En canto ás afiliacións, Galicia é a terceira comunidade con maior subida en termos absolutos e o crecemento rexistrado (+1,42%) supera en 0,95 puntos o incremento do Estado (+0,47%). A contratación, ademais, medra nun 17,69% fronte á subida do Estado do +2,24%.

En palabras da directora xeral de Formación e Colocación, Galicia continúa resistindo á covid-19 e se atopa “no camiño da recuperación”, con menos paro que en febreiro de 2020, “froito da estabilidade” que, tal e como apuntou, demóstrase coa aprobación a semana pasada dun teito de gasto non financeiro para 2022 de 11.571 millóns de euros. “Isto permitirá continuar coa reactivación económica e do emprego e que Galicia recupere a mediados de 2022 o nivel de riqueza precovid”, engadiu.

Lado expuxo que “aos datos positivos” de paro rexistrado súmanse os da EPA que se coñeceron a semana pasada e que confirmaron que a taxa de paro segue sendo mellor en Galicia (12,40 puntos) que no Estado (15,26 puntos), e que a ocupación recuperou a senda positiva con máis dun millón de traballadores pese á covid-19.

A directora xeral lembrou que as previsións macroeconómicas actualizadas a semana pasada pola Xunta prevén que Galicia encadeará dous exercicios de crecemento sostido da economía e do emprego. Para acadar esta meta, Lado indicou que a Xunta está a impulsar no eido laboral o emprego a través do deseño de programas que responden ás necesidades do tecido produtivo. Ao respecto, recordou que o Consello da Xunta celebrado a semana pasada aprobou 72,1 millóns de euros para apoiar aos traballadores e traballadoras pertencentes a diferentes colectivos como son as persoas con discapacidade, desempregados, empregados do sector servizos e traballadores da economía social, así como titulares de empresas abocadas ao peche para a súa transformación en cooperativas ou sociedades laborais.