O conselleiro de Innovación presentou a campaña turística: Este Nadal regálalle unha árbore a Galicia

O conselleiro de Innovación e Industria, Fernando Blanco, presentou no establecemento Casa Gasamáns de Negreira (A Coruña) a campaña de promoción do Turismo Rural e o ambiente “Este Nadal regálalle unha árbore a Galicia”, que en colaboración coa Asociación Galega de Turismo Rural (AGATUR) e a Federación Galega de Turismo Rural (FEGATUR) se estenderá ata o vindeiro mes de febreiro en 200 aloxamentos rurais galegos.

Esta iniciativa é froito de senllos acordos de colaboración entre a Consellaría de Innovación e Industria, a través da Dirección Xeral de Turismo, e os colectivos de propietarios de Turismo Rural, logo da vaga de incendios forestais que rexistrou o territorio galego o pasado mes de agosto.

Por medio desta campaña preténdense incentivar as estadías na rede de aloxamentos rurais de Galiza e reafirmar a imaxe do Turismo Rural logo dos incendios forestais do pasado verán, vencellando este subsector turístico directamente co ambiente natural.

Accións

Durante a vixencia desta promoción turística, os viaxeiros que se aloxen nos establecementos adheridos terán a oportunidade de plantar unha árbore no contorno do aloxamento rural, contribuíndo así ao incremento da masa forestal do territorio galego.

Esta campaña promocionarase a través dos medios de comunicación galegos e do resto do Estado, así como nas distintas feiras turísticas, axencias de viaxes e outras canles de comercialización turística.

Esta iniciativa da Consellería de Innovación e Industria e as asociacións de propietarios de Turismo Rural de Galiza contribuirá tamén a favorecer a desestacionalización do sector que se rexistra nos períodos de menor demanda.

Todas as persoas que desexen participar nesta promoción poderán reservar as súas estadías a través da Central de Reservas de Turgalicia, no teléfono 902 200 432.