Inaugurada na Coruña a exposición itinerante 'Picasso. A viaxe do Guernica'

"A relación entre o Guernica e a Guerra Civil Española é evidente, pero probablemente sexa máis descoñecido o periplo posterior do cadro, que viaxou por moitos países europeos e foi acollidos durante décadas no MoMa, o museo de arte moderna de Nova York, nunha sorte de exilio durante a ditadura, que encaixa co destino de tantas obras e tantos intelectuais, dos que en Galicia temos sobrados exemplos, aos e as que non lles quedou máis saída que fuxir da imposición e do terror", expuxo o rexedor, que estivo acompañado polo concelleiro de Culturas, José Manuel Sande.

O alcalde referiuse tamén á figura de Picasso como veciño da Coruña. "Aínda que viviu só catro anos na nosa cidade, foi unha etapa fundamental na súa formación e na que realizou a súa primeira exposición. É unha boa nova que A Coruña, cidade dos museos, acolla unha mostra sobre Picasso. Axúdanos a completar o círculo e a poñer ao alcance da nosa veciñanza unha obra de excepción e de vangarda".