O plan Turgalicia 2011 fortalecerá a Marca Turística

O conselleiro de Cultura e Turismo, Roberto Varela, presentou no Centro Galego de Arte Contemporánea o Plan de Actuacións do Turismo de Galicia 2011, deseñado “con vocación de servizo público para os múltiples elementos privados que interveñen na actividade turística do noso territorio”. Segundo explicou Roberto Varela, o Plan de Actuacións expón as liñas de traballo da Xunta de Galicia en materia turística e permitirá incidir “no eido do fomento, promoción, formación e ordenación do sector turístico galego”. O acto de presentación contou ademais coa participación da secretaria xeral para o Turismo, Carmen Pardo, e da directora-xerente de Turgalicia, Carmen Pita.

Na súa intervención, o conselleiro Roberto Varela lembrou que o turismo representa “un dos sectores produtivos máis dinámicos da economía do noso territorio, cunha actividade que xa supera o 10 por cento do Produto Interior Bruto de Galicia e que xera unhas cifras de emprego que teñen unha importancia fundamental para a nosa comunidade”. Ao fío destes datos, o conselleiro valorou o turismo de Galicia como “un dos motores estratéxicos da nosa economía”.

Para o conselleiro de Cultura e Turismo, o éxito acadado en 2010 “obríganos a non baixar a garda e manter o posicionamento turístico que conseguimos”. Deste xeito, definiuse para 2011 “un programa de actuacións moi racionalizado e integral, fomentando a promoción do turismo de Galicia”. Roberto Varela amosou a súa confianza “no éxito da comercialización do noso turismo a través da primeira Marca Turística galega, como elemento aglutinador dos distintos elementos que conforman esta actividade tan dinámica e que está a dar os primeiros pasos firmes e seguros”. O conselleiro destacou tamén os “novos reclamos” como a Cidade da Cultura de Galicia “que está a atraer a milleiros de visitantes semana tras semana” ou o Oitavo Centenario da consagración da Catedral de Santiago que servirá “para manter vivo e darlle un novo pulo ao espírito do Xacobeo 2010”.

Eixos do Plan de Actuacións

A secretaria xeral para o Turismo explicou en detalle o contido do Plan de Actuacións do Turismo de Galicia para 2011. Na súa presentación fixo un repaso polos proxectos desenvolvidos dende Turgalicia no 2010, recalcando os éxitos acadados e a continuidade dos mesmos neste 2011, sobre todo tendo en conta que Galicia xa conta coa súa Primeira Marca Turística. O programa de actuacións conta con catro eixos fundamentais, que obedecen a outros tantos obxectivos estratéxicos, dos que penden quince liñas ou obxectivos operativos e cerca de 40 iniciativas ou actuacións nas que se recollen todas as actividades que se desenvolverán ao longo do ano 2011 pola Sociedade de Imaxe e Promoción Turística de Galicia.

O primeiro trátase da construción de notoriedade de imaxe de marca, unha construción artellada, segundo Carmen Pardo, “para crear expectación e presentar a marca do turismo, dar visibilidade e transmitir os valores da nova marca, implicar aos principais creadores de opinión e organizacións empresariais e promover a vinculación de canles de intermediación”. Consolidar a presencia da Marca Galicia no panorama internacional e implicar aos creadores de opinión e organizacións empresariais son tamén obxectivos deste eixo.

En segundo lugar destaca o fomento do descubrimento de Galicia, con liñas específicas nas que se potenciarán os aspectos culturais da comunidade, enriquecendo e personalizando a oferta turística actual e mellorando a experiencia de visita do turista internacional, así como enriquecendo e personalizando a oferta turística actual con iniciativas como a Rede de Centros BTT (Bicicleta Todo Terreo) de Galicia, o turismo ornitolóxico, as rutas dos viños, etc.

O terceiro eixo céntrase na fidelización dos clientes, o contact center ou a aposta pola calidade son iniciativas para traballar neste sentido. O cuarto eixo fundamental do plan de actuacións persegue a redución paulatina da estacionalidade a través de medidas como facilitar o acceso á oferta turística de Galicia fóra de tempada, potenciar os eventos e reforzando as motivacións do excursionista ou comercializando con programas como o Vive Galicia 2011.

Centro Superior de Hostelería de Galicia e Instituto de Estudos Turísticos
Por outra banda, na presentación do plan fíxose fincapé nas liñas de traballo que se levarán adiante en 2011 dende o Centro Superior de Hostelería de Galicia (CSHG) e do Instituto de Estudos Turísticos de Galicia. No que atinxe ao CSHG, contémplase este ano a creación dun máster hoteleiro e a redefinición dos seus títulos para adaptalos ao EEES. Ademais, o CSHG e acometerá un proceso de internacionalización para impartir un título de Bachelor transcontinental, colaborará con organismos internacionais que promovan a gastronomía galega a través do ICEX e desenvolverá cursos de verán para estranxeiros para promocionar o idioma e a gastronomía. Destaca tamén a súa labor de consultoría para o asesoramento da posta en marcha dun centro en Extremadura.

A respecto do IET, resalta a creación e posta en marcha do Observatorio Turístico e a ampliación das súas funcións e do volume de recompilación de datos estatísticos. A investigación e innovación a través da implantación do software de xestión hoteleira así como a súa función formativa para o sector, tamén foi un punto destacado.

Liñas de traballo

A Secretaría Xeral para o Turismo centra en oito puntos o traballo a desenvolver en 2011: desenvolvemento normativo, ordes de subvencións, actividade inspectora, xeodestinos, proxectos europeos, plans de competitividade, sinalización turística e rehabilitación do patrimonio para fins turísticos.

Dentro do desenvolvemento normativo, a Secretaría Xeral para o Turismo aplicará medidas para a simplificación administrativa e o regulamento do Rexistro de Empresas e Acitividades Turísticas. Respecto ás ordes de subvencións, a filosofía da administración turística continuará a ser a de primar a calidade sobre a cantidade e se apostará por incidir na oferta complementaria. Sobre a actividade inspectora, Carmen Pardo destacou a maior produtividade da Administración neste eido e o maior volume da actividade informadora sobre a disciplinaria. A secretaria xeral destacou tamén a creación de 18 xeodestinos e a zonificación turística do territorio. Do mesmo xeito, impulsaranse os proxectos europeos nos que se traballa dende a Secretaría Xeral para o Turismo e dende Turgalicia así como os Plans de Competitividade. Nesta liña, incidirase nos labores de sinalización turística e nos investimentos na rehabilitación do patrimonio para fins turísticos.

Na súa análise do pasado exercicio, Carmen Pardo destacou os rexistros históricos alcanzados durante o Ano Santo 2010. Neste sentido, salientou as cifras de visitantes recibidos en Galicia, en total máis de 9,3 millóns; o incremento do 11,4% no número de viaxeiros aloxados en establecementos regrados respecto de 2009; e o incremento nun 9% nas pernoitas en comparación con ese mesmo período. Segundo a secretaria xeral trátanse duns “resultados excepcionais para Galicia” xa que nos sitúan como unha das comunidades autónomas españolas onde máis medrou o turismo, a segunda despois de Madrid”.

Do mesmo xeito, Carmen Pardo fixo fincapé nos datos sobre rendibilidade empresarial obtidos en 2010 pola nosa comunidade resaltando o bo comportamento do segmento hoteleiro de Galicia xa que foi a única comunidade na que se incrementaron os prezos hoteleiros en 2010. Segundo explicou, o 75% dos empresarios turísticos galegos percibiron un incremento das súas vendas. Os beneficios empresariais subiron para o 72,9% dos empresarios galegos mentres que no contexto nacional a suba quedou no 47%.